కర్నూలు జిల్లా: ■ ఆదోని–ఇస్వి స్టేషన్ల మధ్య ఎక్స్ప్రెస్ రైలు కింద పడి సుమారు 40 ఏళ్ల ఆటో డ్రైవర్ మృతి. ■ శరీర భాగాలపై ఉన్న పచ్చబొట్ల ఆధారంగా మృతుడిని గుర్తించిన భార్య రోజా. ■ తాగుడుకు బానిసై చేసిన ₹4–5 లక్షల అప్పులు తీర్చలేక బలవన్మరణానికి పాల్పడినట్లు నిర్ధారణ.
ఆదోని-ఇస్వి (ISVI) రైల్వే స్టేషన్ల మధ్య శుక్రవారం రాత్రి 11 గంటల సమయంలో రైలు కింద పడి మలేష్ (40) అనే ఆటో డ్రైవర్ ఆత్మహత్య చేసుకున్నాడు. తీవ్రమైన అప్పుల బాధ మరియు మానసిక ఒత్తిడి తాళలేక ఈ దారుణానికి పాల్పడ్డాడు. ఆదోని-ఇస్వి రైల్వే స్టేషన్ల పరిధిలోని కిలోమీటర్ నంబర్ 495/20-22 డౌన్ లైన్ ట్రాక్పై గుర్తుతెలియని వ్యక్తి రైలు నంబర్ 17072 ఎక్స్ప్రెస్ కింద పడి మరణించినట్లు లోకో పైలట్ మొదట సమాచారం అందించారు. ఆదోని స్టేషన్ మాస్టర్ (SMR) ఇచ్చిన ఫిర్యాదు మేరకు రైల్వే పోలీసులు వెంటనే సంఘటనా స్థలానికి చేరుకొని మృతదేహాన్ని స్వాధీనం చేసుకున్నారు. అనంతరం పోస్టుమార్టం నిమిత్తం మృతదేహాన్ని ఆదోని ప్రభుత్వ ఆసుపత్రికి తరలించారు.
మృతుడి వివరాలు తొలుత తెలియకపోవడంతో కుడి చేతిపై ‘మలేష్’ అని, కుడి ఛాతీపై ‘PR’ అని, ఎడమ ఛాతీపై ‘రోజా’ అని ఉన్న పచ్చబొట్ల ఆధారంగా ఆచూకీ కోసం రైల్వే పోలీసులు మీడియాకు వివరాలు వెల్లడించారు. ఈ సమాచారం తెలిసిన వెంటనే మృతుడి భార్య రోజా ఆసుపత్రికి చేరుకొని మృతదేహాన్ని తన భర్త మలేష్గా గుర్తించారు. మృతుడు ఆటో డ్రైవర్గా జీవనం సాగిస్తూ క్రమంగా మద్యం మహమ్మారికి బానిసయ్యాడని కుటుంబ సభ్యులు తెలిపారు. ఆ వ్యసనం కారణంగా స్థానికుల వద్ద సుమారు నాలుగు నుంచి ఐదు లక్షల రూపాయల వరకు అప్పులు చేశాడని, ఆ అప్పులను తీర్చలేక తీవ్ర మానసిక ఒత్తిడికి గురై చివరకు రైలు కింద పడి తనువు చాలించాడని భార్య రోజా. పోలీసులకు ఇచ్చిన వాంగ్మూలంలో పేర్కొన్నారు. రోజా సమర్పించిన సమాచారం మేరకు కేసు నమోదు చేసి పూర్తిస్థాయి దర్యాప్తు చేపడుతున్నట్లు ఆదోని-మంత్రాలయం రైల్వే హెడ్ కానిస్టేబుల్ సి. శివరామయ్య అధికారికంగా వెల్లడించారు.
