కర్నూలు జిల్లా ఆదోని పట్టణంలో శుక్రవారం జరగనున్న వినాయక నిమజ్జన వేడుకలకు పోలీస్, రెవెన్యూ, మున్సిపల్ యంత్రాంగం పకడ్బందీ ఏర్పాట్లు పూర్తి చేశారు. ఎలాంటి అవాంఛనీయ సంఘటనలు జరగకుండా, ప్రశాంత వాతావరణంలో నిమజ్జనం పూర్తయ్యేలా కట్టుదిట్టమైన భద్రతా చర్యలు చేపట్టినట్లు జిల్లా అడిషనల్ ఎస్పీ హుసేన్ పిరా వెల్లడించారు. ఉన్నతాధికారుల ఆదేశాల మేరకు అడిషనల్ ఎస్పీ హుసేన్ పిరా, ఆదోని డీఎస్పీ జి. వెంకట రమణ ఆధ్వర్యంలో గురువారం పోలీస్ అధికారులతో ప్రత్యేక సమన్వయ సమావేశం నిర్వహించారు.
800 మంది పోలీసులతో కట్టుదిట్టమైన భద్రత ఆదోని పట్టణ పరిధిలో మొత్తం 447 వినాయక విగ్రహాలు కొలువుదీరినట్లు అధికారులు తెలిపారు. వీటి నిమజ్జనం సజావుగా సాగేందుకు భారీ ఎత్తున బలగాలను మోహరించారు: ఇద్దరు అడిషనల్ ఎస్పీలు, నలుగురు డీఎస్పీలు, 33 మంది ఎస్ఐలు, 167 మంది ఏఎస్ఐలు & హెడ్ కానిస్టేబుళ్లు, 320 మంది కానిస్టేబుళ్లు, 230 మంది హోంగార్డులు, 400 మంది శిక్షణ పోలీసు సిబ్బంది బందోబస్తు విధుల్లో పాల్గొంటున్నారు.
నిబంధనలు పాటించాలి: అడిషనల్ ఎస్పీ విగ్రహాల ఊరేగింపును కేవలం పోలీసులు నిర్ణయించిన మార్గాల్లోనే నిర్వహించాలని అడిషనల్ ఎస్పీ స్పష్టం చేశారు. సోషల్ మీడియాలో వచ్చే పుకార్లను, వదంతులను నమ్మవద్దని, ఏదైనా అనుమానాస్పద సమాచారం ఉంటే వెంటనే పోలీసులకు తెలియజేయాలని ప్రజలను కోరారు. శాంతిభద్రతలకు విఘాతం కలిగిస్తూ నిబంధనలు ఉల్లంఘించే వారిపై కఠిన చర్యలు తీసుకుంటామని ఆయన హెచ్చరించారు.
ఘాట్ వద్ద ఏర్పాట్లు పూర్తి మరోవైపు ఎల్ఎల్సీ (LLC) కెనాల్ వద్ద నిమజ్జన ఘాట్ ఏర్పాట్లను అధికారులు పరిశీలించారు. ఆదోని, ఎమ్మిగనూరు మున్సిపల్ కమిషనర్లు, మున్సిపల్ ఇంజనీర్, ఎమ్మార్వో (MRO), డీఈఈ (DEE), శానిటరీ ఇన్స్పెక్టర్లు ఘాట్ వద్ద భద్రత, లైటింగ్, పారిశుధ్యం తదితర పనులను సమీక్షించి ఏర్పాట్లు పూర్తి చేసినట్లు తెలిపారు.
