ఆదోని: కర్నూలు జిల్లా ఆదోని పట్టణం మరియు పరిసర ప్రాంతాలలో గురువారం రాత్రి స్వల్ప భూకంపం సంభవించింది. రాత్రి సుమారు 7:45 నుంచి 7:50 గంటల సమయంలో ఒక్కసారిగా భూమి కంపించడంతో స్థానికులు ఉలిక్కిపడ్డారు. భవనాలు, ఇళ్లలోని వస్తువులు స్వల్పంగా కదలడంతో ప్రజలు భయాందోళనలతో ఇళ్ల నుంచి బయటకు వచ్చారు. ప్రధానంగా ఆదోని పరిధిలోని మూడు రోడ్ల జంక్షన్ (మూడు చెట్లు) తదితర కీలక ప్రాంతాల్లో ప్రకంపనల ప్రభావం స్పష్టంగా కనిపించింది.
కేంద్ర భూవిజ్ఞాన మంత్రిత్వ శాఖ పరిధిలోని నేషనల్ సెంటర్ ఫర్ సిస్మాలజీ (NCS) అధికారిక నివేదిక ప్రకారం: తీవ్రత: రిక్టర్ స్కేలుపై 3.6గా నమోదైంది. సమయం: రాత్రి 7:50 గంటల సమయంలో (19:50:33 IST) ప్రకంపనలు రికార్డయ్యాయి. కేంద్రం: కర్నూలు ప్రాంత కేంద్రంగా భూ అంతర్భాగంలో ఈ చలనం చోటుచేసుకుంది.
రిక్టర్ స్కేలుపై 3.6 తీవ్రత అనేది స్వల్ప స్థాయిదే కావడంతో ఎక్కడా ఎలాంటి ప్రాణ, ఆస్తి నష్టం జరగలేదని ప్రాథమిక సమాచారం ద్వారా తెలుస్తోంది. అయినప్పటికీ, ఉన్నట్టుండి భూమి కంపించడంతో స్థానికులు తీవ్ర ఆందోళనకు గురయ్యారు. ప్రజలు ఎలాంటి పుకార్లను నమ్మవద్దని, అప్రమత్తంగా ఉండాలని అధికారులు సూచిస్తున్నారు.
