ఆదోని: కర్నూలు జిల్లా ఆలూరు వైఎస్సార్సీపీ ఎమ్మెల్యే బి. విరూపాక్షికి ఓ హత్యాయత్నం కేసులో ఊరట లభించింది. ఈ కేసులో ఆయనకు ఆదోని 2వ అదనపు జిల్లా కోర్టు బెయిల్ మంజూరు చేస్తూ తీర్పునిచ్చింది. అయితే, ఆయనపై నమోదైన మరో రెండు కేసుల్లో ఇంకా బెయిల్ రాకపోవడంతో ప్రస్తుతానికి జైలులోనే కొనసాగనున్నారు.
ఈ కేసుకు సంబంధించి ఎమ్మెల్యే విరూపాక్షి తరఫున ప్రముఖ న్యాయవాది పొన్నవోలు సుధాకర్ రెడ్డి కోర్టులో బలమైన వాదనలు వినిపించారు. మొత్తం 35 మంది నిందితులుగా ఉన్న ఈ హత్యాయత్నం కేసులో ఎమ్మెల్యే విరూపాక్షితో పాటు 28 మందికి న్యాయమూర్తి షరతులతో కూడిన బెయిల్ మంజూరు చేశారు.
మరో రెండు కేసుల వివరాలు: ◆ ఎస్సీ/ఎస్టీ, హత్యాయత్నం కేసు: మరో ఘటనకు సంబంధించి నమోదైన హత్యాయత్నం, ఎస్సీ/ఎస్టీ అట్రాసిటీ కేసులో ఎమ్మెల్యే విరూపాక్షితో పాటు మొత్తం 48 మంది నిందితులుగా ఉన్నారు. ఈ కేసుకు సంబంధించి న్యాయవాదులు ఇప్పటికే కోర్టులో బెయిల్ పిటిషన్ దాఖలు చేశారు. ◆నిర్బంధం, ఆస్తుల ధ్వంసం కేసు: అక్రమ నిర్బంధం, ఆస్తుల ధ్వంసం ఆరోపణలతో నమోదైన మూడో కేసులో ఎమ్మెల్యే సహా 12 మందిపై కేసులు నమోదయ్యాయి. ఈ కేసుకు సంబంధించి త్వరలోనే ఆలూరు మేజిస్ట్రేట్ కోర్టులో బెయిల్ పిటిషన్ వేయనున్నట్లు న్యాయవాదులు వెల్లడించారు. మిగిలిన రెండు కేసుల్లో కూడా న్యాయ ప్రక్రియ పూర్తయి బెయిల్ లభిస్తేనే ఎమ్మెల్యే విరూపాక్షి జైలు నుంచి విడుదలయ్యే అవకాశం ఉంది.
